Каталония можароси яна авж олди. Мадридда 45 минг киши намойишга чиқди

Мадридда Испания ҳукуматининг Каталонияга нисбатан босимни камайтирганига қарши минглаб одамлар намойишга чиқишди. Норозилик намойишини ўнглар партияси ташкил қилган.
Каталониянинг Испаниядан ажралиб чиқиши имконсиз деб ҳисоблайдиган «Халқ партияси» ва «Фуқаролар» партиясининг фикрича, бош вазир Педро Санчеснинг Каталония мустақиллигини талаб қилаётган сепаратистлар билан музокаралар учун ўртага одам қўйгани ватанга хиёнатнинг ўзгинасидир.

Ўнглар каби социалистлар ҳам Каталония мустақиллиги борасидаги овоз бериш жараёнини қайтадан ўтказишни талаб қилишмоқда. Намойишчилар «Испания бирдамлиги учун», «Ҳозир сайловлар вақти», «Яшасин Испания!» ёзувларини кўтариб чиқишган. Намойишларда 45 минг атрофида одам қатнашгани маълум қилинган.
Испания ҳукумати Каталониядаги сепаратистлар билан музокаралар столига ўтириши мумкинлигини ўнг кучлар қабул қила олишмаяпти. Улар 2020 йилда белгиланган сайловларнинг ҳам олдинга сурилишини талаб қилишмоқда. Намойишчилар вакили Мейбл Кампузанонинг айтишича, бош вазир Педро Санчес Испанияни сотди ва испанлар бундай мулойим раҳбарга муносиб эмас.

«Биз доим музокараларни қўллаймиз»
Педро Санчес бунча гап-сўздан кейин жим турмади ва ўзининг Каталония муаммоси бўйича позициясини яна бир бор очиқлади: «Бизнинг социалистлар партиямиз доим музокараларни маъқул кўрган. Биз «Халқ партияси» ҳукумат тепасида туриб ўта мураккаблаштириб юборган можарони фақат шу йўл билан ҳал қилиш мумкин деб ўйлаймиз», дейди бош вазир.

Педро Санчес кичик партияларнинг, жумладан Каталония сепаратистларининг ҳам мададига умид қилиши сир эмас. Шу сабаб бош вазир вазиятни аввалги ҳукумат каби кескинлик билан эмас, имкон қадар демократик йўл билан ҳал қилмоқчи. 13 февраль куни ҳукумат 2019 йилги бюджет тақсимоти борасида овоз бериш жараёнини ўтказади. Агар чоршанба куни бюджет тасдиқланмаса, бу ўнг кучлар талаб қилаётган 2020 йилги сайловлар муддатидан олдин ўтказилишига олиб келади. Бу тақсимот вақтида ҳукуматга битта овоз ҳам сув ва ҳаводек зарур эканини англаган Каталония сепаратистлари Санчесни музокаралар столига ўтиришни тасдиқласа, уни қўллаб-қувватлашларини маълум қилишган.
Одамлар орасида ўтказилган сўровномага кўра, айни дамда Испанияда ҳукумат тепасида бўлиб турган социалистларнинг (яъни ишчилар партияси) ҳолати керакли даражада мустаҳкам эмас. Масалан, декабрда ўтказилган сайловларда ўнг кучлар ҳисобланувчи «Халқ партияси», «Фуқаролар» ва «Овоз» партиялари Андалусияда энг кўп овозга эга бўлишди ва бу ерда 36 йилдан буён давом этаётган ишчилар партиясининг гегемонлигига чек қўйилди.
Каталонияда нима гаплар?
Ўтган йил май ойида Каталония националистлари Барселона раҳбариятини қўлга олишди. Бунгача Барселона 7 ой давомида тўғридан-тўғри Мадрид томонидан бошқарилганди. Июнда ҳукумат тепасига келган Педро Санчес Каталония мустақиллиги бўйича музокаралар ўтказишни таклиф қилди.
Бироқ янги ҳукуматнинг келиши ҳам Каталониядаги вазиятни юмшата олмади. Каталонияликлар мустақиллик учун чиқишлари давлат тўнтаришига уриниш деб баҳоланганидан ҳамон дарғазаб. Декабрда Каталония раҳбари Куим Торранинг 1991 йил 10 кун давом этган урушдан сўнг Югославиядан ажралиб чиққан Словенияни олқишлаши Мадридда саросима бошланишига сабаб бўлди.