Британияда иш ҳақини ололмагани учун бешта уйни бузиб ташлаган қурувчи тўрт йилга қамалди

Буюк Британиянинг Бантингфорд шаҳрида экскваторда бешта уйни бузиб ташлаган руминиялик қурувчи Дэниел Нигу тўрт йилга озодликдан маҳрум қилинди. Унинг сўзларига кўра, қурилиш компанияси унга 16 минг фунт миқдоридаги иш ҳақини бермаган.
Воқеа ўтган йилнинг августида юз берган. 30 ёшли Дэниел Нигу янги қурилган уйлар олдига экскаваторда келган ва бешта бинони бузиб ташлаган. Унинг бу ҳаракати видеотасвирга тушган. Маҳаллий аҳоли уни тўхтатишга уринган. У эса қургани учун пули тўланмаган уйларни бузаётганини айтган.
Судья унинг қилмишини «олдиндан режалаштирилган бузғунчилик» деб баҳолаган. 
Февралда Нигу ўз айбига иқрор бўлган. Қурилиш компаниясининг билдиришича, ҳар бир уйнинг нархи 800 минг фунтга тенг бўлган. Компания ушбу уйлар эгалари «бир неча ойдан кейин» кўчиб киришлари мумкинлигини билдирган.