Индонезияда қирилиб кетган деб ҳисобланган улкан ари топилди

Дунёда энг катта ари ҳисобланувчи Уоллес ариси (Megachile pluto) 38 йил ичида илк бор Индонезиянинг Молукк ороллари шимолида топилди. Бу ҳақда The Guardian нашри хабар берди. 
Таъкидланишича, ари аввал қирилиб кетган деб ҳисобланган. Шимолий америкалик ва австралиялик биологлар танаси узунлиги 4 смга етувчи арининг урғочисини дарахтдаги термитникда аниқлашган. 
Маълум қилинишича, ушбу улкан арини биринчи бўлиб британиялик табиатшунос Альфред Уоллес 1858 йилда таърифлаб берган. У “ арига ўхшаш, буғу қўнғиз каби катта жағга эга катта қора ҳашарот” ҳақида хабар қилган.
1981 йилда арини америкалик энтомолог Адам Мессер аниқлашга муваффақ бўлган. 
Нашрнинг таъкидлашича, ҳашаротнинг яшаш муҳити ўрмонлар кесилиши сабабли хавф остидадир. Бундан ташқари, арининг ноёблиги ва катта ўлчами уни коллекционерлар учун “орзудаги ўлжа”га айлантиради.