14 нафар мехоҳанд, раиси ҷумҳури Афғонистон шаванд

Дар Афғонистон рӯзи 20-уми январ муҳлати сабти номи довталабон ба мақоми номзад ба раиси ҷумҳур ба поён расид ва кумиссиёни интихоботӣ 14 нафарро сабти ном кардааст.

Ашраф Ғанӣ, раиси ҷумҳури феълӣ, Ҳаниф Атмар, мушовири амнияти миллӣ ва Абдулло Абдулло, раиси ҳукумати иҷроия аз довталабони мақоми раиси ҷумҳур ҳастанд.

Ашраф Ғанӣ ва Абдулло Абдулло дар интихоботи соли 2014 рақибони ҳам буданд ва дар он вақт, мегуфтанд, ки дар интихобот тақаллуби зиёде сурат гирифтааст.

Баъди моҷарои зиёд, бо миёнҷигарии Ҷон Керрӣ, вазири умури хориҷии Амрико дар Афғонистон ҳукумати ваҳдати миллӣ таъсис доданд ва Ашраф Ғанӣ, раиси ҷумҳур ва Абдулло Абдулло, раиси ҳукумати иҷроия эълон шуд.

Интихоботи раёсати ҷумҳурии Афғонистон рӯзи 20-уми июл ҳамроҳ бо интихоботи маҷлисҳои вилоятӣ ва ноҳиявӣ сурат мегирад.