Мунтахаби футболи Тоҷикистон дар финали мусобиқаи «Hero Interсontinental Cup 2019»

Дар даври сеюми мусобиқаи байнулмилалии «Hero Interсontinental Cup 2019» дар шаҳри Аҳмадободи Ҳиндустон мунтахаби футболи Тоҷикистон бо ҳисоби 0 бар 1 аз дастаи Кореяи Шимолӣ шикаст хӯрда, лекин бо касби 6 имтиёз ба даври финалии мусобиқа роҳ ёфт.

Рақиби футболбозони тоҷик дар бозии финалии мусобиқа имрӯз, 16 июл аз рӯи натиҷаи бозӣ байни дастаи мизбон - Ҳиндустон ва Сурия муайян мешавад, хабар дода мешавад дар сомонаи расмии Федератсияи футболи Тоҷикистон.

Гуфта мешавад, дар сурати ғалабаи дастаи Сурия мунтахаби Тоҷикистон бо ин даста ва дар сурати бохти Сурия дар ин бозӣ ё натиҷаи мусовӣ, футболбозони тоҷик дар вохӯрии финалӣ бо тими Кореяи Шимолӣ бозӣ мекунанд.

Қобили зикр аст, ки дар ду бозии даври гурӯҳии мусобиқаи «Hero Interсontinental Cup 2019» футболбозони тоҷик мунтахабҳои Ҳиндустонро бо ҳисоби 4 бар 2 ва Сурияро бо ҳисоби 2 бар 0 шикаст дода буданд.

Read more: https://news.tj/tj/news/tajikistan/20190716/muntahabi-futboli-toikiston-dar-finali-musobiai-hero-intersontinental-cup-2019