Домодҳои чинӣ аз ҳамсарони покистонии худ танфурӯш сохтаанд.

Исломобод қочоқ ва фурӯши духтарони покистониро таҳқиқ мекунад, ки бо ваъдаи издивоҷ ба Чин бурда ва ба танфурӯш табдил дода мешаванд. Ин занон аз наздиконашон илтиҷо доранд, ки онҳоро наҷот диҳанд.
Римша дар либоси сафеди арӯсӣ канори домод истодааст. Шод аст. Наварӯсон ангуштони худро ба шакли рамзи дил ба ҳам овардаанд. Зернавис: "Ишқ то абад". Вале "абад" як сол ҳам давом накард.
Насронидухтари покистонии 27-сола ва домод аз Чин тирамоҳи соли гузашта дар Лоҳур зану шавҳар шуданд. Наздикони Римша издивоҷро имкони хушбахтӣ ва барои оила беҳбуди молӣ донистанд.
Парвин, модари духтар мегӯяд, бино бар маълумоти бунгоҳи издивоҷ, домод раҳбари як корхона буд ва додари Римша метавонад, дертар ба Чин равад ва он ҷо кори хубе ёфта, ба хонавода пул фиристад.
"Фикр мекардем, духтари мо хушбахт мешавад. Онҳо ваъдаи ҳаёти осуда медоданд" - гуфт Парвин ба Бахши покистонии Радиои Озодӣ. Мусоҳиба дар пеши кулбае дар маҳаллаи насрониҳо сурат гирифт. Ӯ афзуд: "Мо ба банди ҳирс ҳам афтода будем."
Орзуи беҳбуди зиндагӣ, ки ба ҷомеаи ҳошиянишини насронии Покистон хос аст, зиндагии ин оиларо ба як кобус табдил дод. Римша, ки то ҳол дар Чин аст, мегӯяд, шавҳараш ӯро мезанад, аз ӯ суистифода мекунад.
Ӯ мегӯяд: "Вай аз ман мехоҳад, бо ҳамаи дӯстонаш дар ивази пул ҳамхоба шавам. Агар рад кунам, мезанад.. Илтиҷо дорам, наҷотам диҳед, — гирёну нолон мегӯяд Римша дар видеое, ки аввалҳои моҳи июн ба наздиконаш фиристодааст.
Римша, ки номи пуррааш ифшо карда намешавад, яке аз даҳҳо зани панҷобист, ки зоҳиран бо фанду фиреб бо чиниҳо издивоҷ карда ва дар Чин мавриди истисмори шаҳвонӣ қарор гирифтаанд.

Моҳи май мақомоти покистонӣ даҳҳо шаҳрванди Покистон ва Чинро бо гумони даст доштан дар қочоқи инсон ва истисмори ҷинсӣ боздошт карданд. Бархе аз ҷабрдидагон гуфтаанд, ки ба онҳо таҳдид мекардаанд, мекушанд ва аъзои баданашонро мегиранд.
Пекин, ки яке аз шарикони калидии амниятӣ ва иқтисодии Исломбод аст ва барои бунёди долони иқтисодии чинию покистонӣ (CPEC) миллиардҳо доллар сармоя гузоштааст. Мақомти Чин ин иддаоҳоро рад мекунад.
"Ин дурӯғ аст, ки духтарони покистониро барои танфурӯшӣ ва аъзои баданашон ба Чин мефурӯшанд» - навишт дар в Twitter сафири Чин дар Исломобод дар моҳи май.

​OZODI​​​