Паёми тозаи Аҳмад Масъуд: ҳарфи толибон ба мо таслим ва байъат буд

Оқои Масъуд таъкид мекунад, ки бо дарки ҳама масоил, ки соли гузашта дар Афғонистон рух дод, он замон ҷанги худро мутаваққиф карда буд

Аҳмад Масъуд, раҳбари Ҷабҳаи муқовимати миллии Афғонистон, дар паёми наврӯзии худ гуфтааст, ки соли гузашта бар хилофи интизориҳо барои мардуми Афғонистон соли хубе набуд.

"Мутаассифона, соли гузашта бар хилофи интизориҳои мардуми афғон соли хуб набуд. Мо ҳама ба хатми раванди сулҳ умед доштем. Мутаассифона, бо сабабҳои гуногун, аз ҷумла, набуди ирода аз суи толибон барои хатми ҷанг, боъиси аз байн рафтани фурсати сулҳ шуд", - гуфтааст Аҳмад. Оқои Масъуд таъкид мекунад, ки бо дарки ҳама масоил, ки соли гузашта дар Афғонистон рух дод, ҷанги худро мутаваққиф карда буд.

"Ҳама масъалаҳоро бо тасмими уламои кишвар дарк карда, барои он ки тарафи ҷанг набошем, онро хатму истод сохтем",- мегӯяд ӯ.

Раҳбари Ҷабҳаи муқовимати миллии Афғонистон дар робита ба музокироти сулҳ бо Толибон гуфт: "Мутаассифона, ҳарфҳои онҳо ба мо беш аз ду масъала набуд, яке таслим ва дуввуми байъат, ҳозир ба шунидани роҳи ҳалли мушкили аслии Афғонистон ва механизме, ки мо тавонем якҷоя зиндагӣ кунем ва фазои сулҳ эҷод кунем, мутаассифона барои онҳо вуҷуд надоштанд."

Аҳмад Масъуд таъкид мекунад, ки ҳамеша ба толибон гуфта мешуд, ки Афғонистон ба ҳукумате ниёз дорад, ки аз ҷониби мардум идора мешавад ва ин низомест, ки машрӯъиятро аз мардум гирифтааст, на аз берун, аммо толибон инро қабул накарданд ва ҳарфашон идомаи ҷанг буд.

Оқои Масъуд афзуд, ки ҷанг болояшон аз сӯи толибон таҳмил шудааст ва Ҷабҳаи муқовимат ба хости мардум ташкил шудааст ва муборизаи худро алайҳи ҳар навъ зулм ва истилогарон идома медиҳад.

Оқои Масъуд бо ишора ба гурӯҳҳои дигар гуфт: Гурӯҳҳои дигар ба пеш қадам гузоштанд, истиқбол ва эъломи пуштибонӣ карданд ва ваҳдату ҳамбастагии тамоми мардуми Афғонистонро зарурати аслӣ барои пирӯзӣ бар зулм ва зулмот медонанд.

Раҳбари Ҷабҳаи Муқовимат таъкид мекунад, ки ҳамкориҳои Толибон бо дигар гурӯҳҳои террористӣ коҳиш наёфта ва Афғонистон имрӯз ба як паноҳгоҳи амни террористҳои ҷаҳонӣ табдил ёфтааст.

"Мо иттилоъ ва гузоришҳои дақиқ дорем, ки дар партави ҳимояти толибон аз як гурӯҳи террористӣ, назири "Ал-Қоида"* (ташкилоти террористии фаъолияташ дар ФР мамнуъ) марказҳои омӯзишӣ, шумори ҷалби афроди худро афзоиш додаву фаъолиятҳояшро густариш додааст",- афзуд ӯ.

Оқои Масъуд ҳушдор додааст, ки табдили Афғонистон ба пойгоҳи террористӣ барои минтақа ва ҷаҳон хатари ҷиддӣ хоҳад дошт ва аз кишварҳои минтақа ва ҷомеъаи ҷаҳонӣ хостааст, ба авзоъи кунунии Афғонистон таваҷҷуҳи ҷиддӣ диҳанд.