Миннатдории тоҷикони муқими Русия аз Эмомалӣ Раҳмон ва Рамазон Раҳимзода

Тибқи гузориши Вазорати корҳои дохилӣ, онҳо бо роҳбаладии кормандони мақомоти корҳои дохилӣ дар баробари иштирок дар тантанаҳои ҷашнии шаҳрҳои Душанбеву Кӯлоб ва Роғун, инчунин тӯли як ҳафта аз бисёр ҷойҳои тамошобоб ва бунёдкориҳои Тоҷикистони азиз аз наздик шинос гардидаанд.

Намояндагони ҷамъиятҳои тоҷикон зимни сафар ба Корхонаи истеҳсоли обҳои ташнашикан ва маҳсулоти "Сиёма" дар шаҳри Душанбе аз фаъолияти он шинос шудаанд.

Ҳамзамон, онҳо аз шароиту имкониятҳои мавҷудаи Маркази истироҳативу фароғатӣ ва сайёҳии кӯли “Душанбе”, аз он ҷумла мағоза, тарабхона, ҳавзҳо, аквапарк, боғи ҳайвонот, майдончаҳои назди соҳили кӯл ва дигар иншооти фароғатии он ошно шудаанд.


Дар идомаи сафар ҳамватанонамон ба қисми низомии 3502-и Раёсати Қӯшунҳои дохилии ВКД ташриф оварда, ба шароити будубоши сарбозон шинос гардидаанд.

Тибқи иттилои манбаъ, сарбозон дар ҳузури меҳмонон якчанд машқҳои омодагии худро ба намоиш гузоштаанд.

Инчунин, тамошои гӯшаҳои зебою дорои манзараҳои ҷолиб - машқгоҳи саҳроии "Марғоб"-и ВКД, воқеъ дар дараи Ромити шаҳри Ваҳдат ва Осоишгоҳи "Хоҷа Оби Гарм" идомабахши сафари ҳайати гурӯҳ будааст.

Манбаъ афзуда, ки зимни сафар ба ноҳияи Ховалинг бошад, намояндагони ҷамъиятҳои тоҷикони муқими шаҳру вилоятҳои Русия, Оромгоҳи Султон Увайсро зиёрат намуда, аз Дараи Мухтор ва корҳои ободониву созандагӣ дар ҷамоати деҳоти Лоҳутӣ ва дигар мавзеъҳои ин ноҳия дидан карда, ин ҳама дастовардҳоро аз баракати соҳибистиқлолӣ донистаанд.

Ҳамватанонамон бо бардоштҳояшон аз ин сафар хушҳол гардида, иброз доштаанд, ки халқи тоҷик зери сиёсати инсондӯстона ва бунёдкорона ба пешравиҳои аз ин ҳам назаррас ноил хоҳанд гардид.

Манбаъ афзуда, дар охир намояндагони ҷамъиятҳои тоҷикон ба роҳбарияти олии кишвар ва вазири корҳои дохилӣ генерал-полковники милитсия Рамазон Раҳимзода миннатдории самимонаи хешро баён намуданд.