Алмазбек Атамбоев суд жараёнида иштирок этишдан бош тортди

11 октябрда Қирғизистонда жиноий авторитет Азиз Батукаевнинг ноқонуний озод этилиши иши бўйича жараён суд залига собиқ президент Алмазбек Атамбоев етказила олинмагани сабабли кейинга қолдирилди. Бу ҳақда Қирғизистон бош прокуратурасида Kaktus.media нашрига маълум қилинган. 
Таъкидланишича, Атамбоев тергов изолятори камерасидан чиқишдан бош тортган. 
Батукаевнинг озод этилиши иши бўйича Атамбоев ва унга яқин бир неча киши айбланмоқда. Суд залига қолган айбланувчилар – Индира Жолдубаева, Абдухалим Раимжонов ва Қалибек Қачкиналиев етказилган. 
“Таъкидлаш жоиз, қонунга кўра, жиноий ишнинг дастлабки тингланиши айбланувчининг илтимоси билан унинг иштирокисиз ўтказилиши мумкин. Бироқ айбланувчи Алмазбек Атамбоев бундай илтимос билдирмаган”, дейилган прокуратура хабарида. 
Атамбоевнинг адвокати Сергей Слесаревнинг айтишича, “Атамбоев ҳокимият унга таклиф этаётган бу ўйинда иштирок этишдан бош тортган”. “У ўзини айбдор деб ҳисобламайди”, деб айтган адвокат. Таъкидланишича, суд жараёни 14 октябрга қолдирилган.