Қирғизистон - Тожикистон чегарасида яна можаро юз берди. Бу сафар шағал туфайли

2019 йил 2 сентябрда Қирғизистон-Тожикистон давлат чегарасида навбатдаги можаро юз берди, унинг давомида тожик чегарачилари ҳавога қарата огоҳлантирувчи ўқ уздилар. Бу ҳақда Қирғизистон Давлат чегара хизматининг Жамоатчилик ва оммавий ахборот воситалари билан алоқалар бошқармаси хабар қилди, деб ёзмоқда Knews.
Боткен вилояти, Боткен туманининг Оқсой қишлоғидан унча узоқ бўлмаган жойда, Қирғизистон фуқаролари Оқсой дарёсининг бир қирғоғида бўлиб туриб, дарёдан шағални машиналарга ташишган.
Шу вақт, дарёнинг бошқа қирғоғига (Тожикистон Республикаси ҳудудида) тожик чегарачилари наряди етиб келган, улар ҳавога қарата уч маротаба огоҳлантирувчи ўқ узишган.
Қурбонлар ва жабрланганлар йўқ.
Можаро сабаблари ва тафсилотларини аниқлаш, шунингдек, унинг янада авж олишига йўл қўймаслик мақсадида Қирғизистон ва Тожикистон чегара вакилларининг учрашуви бўлиб ўтди. 
Бундан олдин, 31 август куни Тожикистон ва Қирғизистон чегарасида можаро келиб чиққани хабар қилинганди.