Соли 2018 дар Бадахшон 6 ширкати сайёҳӣ ба фаъолият оғоз карданд
Яке аз дастовардҳои Бадахшон дар соҳаи сайёҳӣ ин дар озмуни Германия ба феҳристи сад мавзеи диданбоби ҷаҳон шомил гардидани кӯҳҳои Помири Тоҷикистон ва шоҳроҳи Кӯлоб-Қалъаихум-Дарвоз- Хоруғ- Қулма мебошад
Аз 15 нафари шахсони воқеӣ, ки дар соли 2018 ҳуҷҷатҳои худро барои сабти ширкатҳои сайёҳӣ пешниҳод карданд танҳо 6 барнома ва оиннома пазируфта шуд, иттилоъ додааст ожонсии “Ховар”.
Ассотсиатсияи сайёҳию экологӣ ва фарҳангии Помир дар ҳамкорӣ бо бахшҳои давлатию хусусӣ дар деҳоти дурдасти ВМКБ меҳмонхонаҳои хурди мутобиқ ба шароити муосир бунёд хоҳад кард. Дар назди ин меҳмонхонаҳо дӯконҳои маҳсулоти ҳунармандони маҳаллӣ низ кушода мешаванд.
Дар соли 2018, ки Соли рушди сайёҳӣ ва ҳунарҳои мардумӣ эълон гардида буд, тавассути фароҳам гардидани шароити мусоид барои инкишофи ин соҳаи муҳиму сердаромад шумораи довталабони ташкили ширкатҳои сайёҳӣ дар вилоят зиёд гардидааст.
Ба гуфтаи масъули Ассотсиатсияи сайёҳию экологӣ ва фарҳангии Помир Мирзо Мирзоев «Сабти ном шудани боз 6 ширкати сайёҳӣ маънои онро дорад, ки соли равон боз даҳҳо нафар аз ҷавонони маҳаллӣ соҳиби шуғлҳои гуногун гардида, ҳам сатҳи зиндагии хонаводаи худро боло мебаранд ва ҳам буҷаи маҳаллиро ғанӣ месозанд. Ҳоло ассотсиатсияи мо 23 аъзо дорад. Бо фаъол гардидани ин ширкатҳо шумораи онҳо дар вилоят ба 18 адад расид».
Инчунин як сокини ноҳияи Мурғоб бо аҳли хонаводааш дар маркази ноҳия дӯкони ҳунармандӣ кушодааст, ки дар он на танҳо маҳсули ҳунари дастони онҳо ба сайёҳон пешниҳод мешавад, балки дигар ҳунармандони ноҳия низ маҳсулоти худро барои фурӯш ба ин дӯкон месупоранд.Бояд зикр кард, ки соли 2018 дар бахши сайёҳии вилоят рӯйдодҳои хотирмон ба амал омаданд. Яке аз ин дастовардҳо дар озмуни сайёҳии Германия ба феҳристи сад мавзеи диданбоби ҷаҳон шомил гардидани кӯҳҳои Помири Тоҷикистон ва шоҳроҳи Кӯлоб –Қалъаихум-Дарвоз- Хоруғ- Қулма мебошад.
Комментарии (0)