Франция AstraZeneca вакцинасини янги штаммларга қарши қўлламасликка қарор қилди

Франция AstraZeneca вакцинасини янги штаммларга қарши қўлламасликка қарор қилди
Франция президенти Эммануэл Макрон мамлакатда коронавируснинг янги штаммларига қарши AstraZeneca компанияси вакцинаси қўлланмаслиги, унинг ўрнига самаралироқ бошқа воситалардан фойдаланилишини маълум қилди.   
«Биз ҳозир ушбу вакцинани қўллашни давом эттирмоқдамиз, чунки у бизга инқироздан чиқишда ёрдам бермоқда. Бироқ янги штаммлар хавфига жавоб беришимиз учун бизга самаралироқ бошқа воситалар лозим», деб айтган Макрон.
Франция етакчиси Европа иттифоқининг 2021 йил иккинчи ярми учун AstraZeneca вакцинаси етказилиши бўйича шартномани узайтирмасликка қарор қилганини шундай тарзда қўллаб-қувватлаган.
26 апрелда Еврокомиссия AstraZeneca’ни Европа иттифоқига вакциналарни етказиш бўйича шартномани бузгани учун судга берган.
Компания билан 2020 йил ёзда Европа иттифоқига 400 млн вакцина етказиш бўйича шартнома имзоланган. Ҳужжат компания ўз воситасини ишлаб чиқишни ҳали якунламасидан тузилган.
Жорий йил март ўртасида Еврокомиссия раҳбари Урсула фон дер Ляйен Европа иттифоқида коронавирус билан боғлиқ вазият ёмонлашгани, янги штаммлар пайдо бўлганини маълум қилган. У буни аҳолини эмлаш суръатлари пасайгани билан боғлаган ва бунда AstraZeneca’ни айблаган.
Ҳозирда Европа иттифоқида 4та вакцинани қўллашга рухсат берилган: Pfizer, Moderna, AstraZeneca ҳамда Janssen воситалари.

Комментарии (0)

Оставить комментарий