Русия ё Россия, Ӯзбекистон ё Узбакистон, Полша ё Лаҳистон? Раис гуфт, кадомаш дуруст

Русия ё Россия, Ӯзбекистон ё Узбакистон, Полша ё Лаҳистон? Раис гуфт, кадомаш дуруст
Олимҷон Муҳаммадҷонзода, раиси Кумитаи забон ва истилоҳоти Тоҷикистон, мегӯяд, қоидаҳои нави имло тарзи навишти дурусти номҳои ҷуғрофиро ба танзим медароранд

Муҳаммадҷонзода зимни нишасти матбуотӣ гуфт, аз ҷумла тарзи навишти номи давлатҳо, ки ба гуруҳи ҷуғрофӣ шомил мешаванд, дар қоидаҳои ҷадид муфассал навишта шудаанд.

Раиси Кумитаи забон зикр кард, ки бештари номи давлатҳо ба шаклҳои гуногун пайдо шудаанд. Ӯ афзуд, дар як рӯзнома Инглистон менависанд, дар як ҷо Англия, як ҷо Фаронсаю дигар ҷо Франсия.

Навишти дугунаи давлатҳо дар Тоҷикистон зиёд ҷой дорад. Аз ҷумла Маскав Москва, Россияю Русия, Полшаю Лаҳистон, Ҷопону Япония, Ӯзбекистону Узбакистон ва ғайра.  

Муҳаммадҷонзода таъкид намуд, ки барои ҷилавгирӣ аз духӯрагиҳо тасмим гирифтем, дар мувофиқа бо Вазорати корҳои хориҷии Тоҷикистон ин масъаларо дар қоидаҳои нави имло дарҷ кунем, ки баъди тасдиқ пешниҳод мешавад.

Ӯ ба суол, ки Инглистон дуруст ё Англия, посух дод, ки мою шумо дар талаффузамон Инглистон мегӯем, аммо вақте ки дар ҳуҷҷатҳои расмӣ Англия рафтааст, мо аз он берун баромадан наметавонем.

“Дар вақте шумо мақола ё ягон китоб менависед, озод астед, метавонед Инглистон нависед, аммо дар ҳуҷҷатҳои расмӣ бояд Англия нависед, чунки дигар шаклаш қабул нест”, - тавзеҳ дод Муҳаммадҷонзода.

Ӯ афзуд, ки ин мушкилот на танҳо ба ВАО дахл дорад, балки баъзан дар коргузориҳои расмӣ низ ҷой доранд. Ба гуфтаи раиси Кумитаи забон қоидаҳои нав ин духӯрагиҳоро ба танзим хоҳад даровард.

Комментарии (0)

Оставить комментарий