Хуруҷи коронавирус дар минтақаи наздисарҳадӣ ва талаби мақомоти қирғиз аз тоҷикистониён
Қирғизистон дар вилояти Бодканди ҳамсарҳад бо Тоҷикистон афзоиши ҳолатҳои гирифторӣ ба коронавирусро сабт карда, чораҳои беҳдоштиро таҳким бахшидааст
Мақомоти вилояти Бодканди Қирғизистон дар пайи афзоиши бемории коронавирус чораҳои маҳдудкунандаро шиддат бахшиданд, хабар дод Ситоди ҷумҳуриявии мубориза бо коронавирус дар ин кишвар.
Дар вилояти Бодканд назорати пӯшидани ниқоб пурзӯр карда шуда, санҷишҳои риояи қоидаҳои беҳдоштӣ дар мағозаҳо, марказҳои тиҷоратӣ ва дигар ҷойҳои ҷамъиятӣ афзоиш ёфтаанд.
Манбаъ афзуд, ки аз рӯзи 28 сентябр муваққатан ҳаракати нақлиёти ҷамъиятии байни вилоятҳо, байни ноҳияҳо ва шаҳрҳо қатъ карда шуд.
Шаҳрвандони Тоҷикистону Ӯзбекистон, ки марзи вилояти Бодкандро убур мекунанд, бояд маълумотнома дар бораи надоштани коронавирусро пешниҳод намоянд, ки тайи се рӯзи охир гирифта шуда бошад.
Инчунин дар вилояти Бодканд муваққатан намозҳои ҷомеи ҷумъа манъ гардида, барои пешгирӣ аз коронавирус кори бозорҳои чорво мутаваққиф шудааст.
Комментарии (0)